តារាចម្រៀង5នាក់ទទួលគ្រឿងឥស្សរិយយសពីរាជរដ្ឋាភិបាល

រាជធានីភ្នំពេញ ៖ តារាចម្រៀងប្រុសស្រីល្បីឈ្មោះ៥នាក់ទទួលបានគ្រឿងឥស្សរិយយសពីរដ្ឋាភិបាលបន្ទាប់ពីពួកគេចំណាយកម្លាំងកាយចិត្ត និងពេលវេលាចូលរួមលើកកម្ពស់សកម្មភាពមនុស្សធម៌នៅក្នុងសង្គម ពិសេសជុំវិញការជំរុញនិងផ្សព្វផ្សាយឲ្យមហាជនបានយល់ពីបញ្ហាអំពើពុករលួយ។ កម្មវិធីប្រគល់នេះធ្វើឡើងកាលពីល្ងាចថ្ងៃទី៦ ខែមករា ឆ្នាំ២០១៧ នៅក្នុងទិវាបុណ្យជាតិ៧មករា និង«ទិវាអន្តរជាតិប្រឆាំងអំពើពុករលួយ»ដែលរៀបចំដោយអង្គភាពប្រឆាំងអំពើពុករលួយ(ACU)នៅសាកលវិទ្យាល័យភូមិន្ទភ្នំពេញ ។

តារាចម្រៀងដែលទទួលបានមេដាយ និងប័ណ្ណសរសើរទាំង៥នាក់នោះមានអ្នកនាង មាស សុខសោភា;កញ្ញាសុគន្ធ និសា ;កញ្ញាញឹម ចាន់ថន;លោកឆន សុវណ្ណរាជ និងលោកខាត់ ជេម ។

ប្រធានអង្គភាពប្រឆាំងអំពើពុករលួយលោកទេសរដ្ឋមន្ត្រីឱម យិនទៀងមានប្រសាសន៍ថា សិល្បករបានដើរតួនាទីយ៉ាងសំខាន់ក្នុងការចូលរួមអភិវឌ្ឍកម្លាំងស្មារតី បម្រើអារម្មណ៍មនោសញ្ចេតនាចាប់តាំងពីកម្ពុជាបញ្ចប់សង្គ្រាម ភ្លាមៗមកម្ល៉េះ ។ ការចូលរួមចំណែកពីសិល្បករបង្កើតឲ្យមានបរិយាកាសសប្បាយរីករាយ និងបំពេមនុស្សឲ្យសុខសាន្តបាន ។ គ្មានសិល្បករគឺគ្មានមនោសញ្ចេតនា គ្មានព្រលឹង ហើយរដ្ឋាភិបាលពិតជាត្រូវការសិល្បករដើម្បីចូលរួមចំណែកជួយដល់សង្គម ។

កញ្ញាញឹម ចាន់ថន ដែលបានស្ម័គ្រចិត្តចូលរួមសកម្មភាពសិល្បៈជាមួយអង្គភាពប្រឆាំងអំពើពុករលួយរយៈពេល៤ឆ្នាំមកហើយនោះទទួលបានគ្រឿងឥស្សរិយយសបន្តបន្ទាប់គ្នា ។ ឆ្នាំនេះនាងទទួលបានគ្រឿងឥស្សរិយយស មុនីសារាភណ្ឌថ្នាក់ធិបឌិន្ទដែលចុះហត្ថលេខាដោយសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ នៅក្នុងឱកាសនោះ កញ្ញា ញឹម ចាន់ថន រំភើប រីករាយរកអ្វីប្រៀបផ្ទឹមមិនបានចំពោះការបានទទួលគ្រឿងឥស្សរិយយសពីរដ្ឋាភិបាល ។ កន្លងមកកញ្ញាចាន់ថន ធ្លាប់បានចូលរួមសកម្មភាពនានា ពិសេសទាក់ទិននឹងការដឹកនាំរៀបចំឲ្យមានព្រឹត្តិការណ៍ប្រគំតន្ត្រីនានា ។

កញ្ញាញឹម ចាន់ថន និយាយថា«វាគឺជាអ្វីដែលចេញពីទឹកចិត្តចូលរួមដល់កិច្ចការសង្គមដោយមិនគិតពីការនឿយហត់ ហើយនាងខ្ញុំពិតជាចង់ឲ្យសិល្បករល្បីឈ្មោះកាន់តែច្រើនចូលរួមកម្មវិធីនេះដើម្បីប្រយោជន៍ជាតិ» ។

សិល្បករដែលទទួលបានគ្រឿងឥស្សរិយយសពីរដ្ឋាភិបាល នាឱកាសនោះត្រូវបានបំពាក់និងប្រគល់ជូនដោយលោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ៕